بهاء الدين محمد يكشف كواليس ابتعاده عن التعاون مع المطربات: دفعت التمن لوحدي
كشف الشاعر الغنائي بهاء الدين محمد عن أسباب قلة تعاونه خلال الفترة الأخيرة مع المطربات، موضحًا أن نجاح أغنية "أكتبلك تعهد" تسبب في تعرضه لمواقف عديدة، وصلت إلى إلغاء عدد من الأغاني والمشروعات الفنية التي كان من المقرر أن تجمعه بعدد من النجمات.
دفعت التمن لوحدي
وكتب: "كتير بيسألونى إنت ليه مابقيتش تنزل مع مطربات؟ ومضطر أحكيلكم اللى حصل بعد كارثة نجاح أكتبلك تعهد اللى دفعت تمن نجاحها بكل الطرق، مطربة نجمة إتصلت تباركلى أيامها على النجاح وشكرتها وفوجئت تانى يوم إنها لغت الإستوديو لأغنية مهمه، ومطربة نجمة إتصلت بيا ومش عاجباها أكتبلك تعهد وعاملتها بكل ذوق إحتراما لغيرتها وبرضه لغت أغانيها معايه".
وتابع: "ومطربة نجمة كنا بنحضر ٦ أغانى وفجأة لغت كل أغانيا، ومطربة نجمة كانت عايزه أكتبلك تعهد راب ولأنى إعترضت على اللحن لأنى عارف الشكل اللى لازم يحاوط كلماتى وإتضايقت ولغت باقى شغلى ومانزلش، والمطربة اللى قالت لملحن بهاء الدين محمد بيحب أنغام أكتر منى واللى واللى واللى...".
وأضاف: "وهى دى المواقف اللى إتعرضتلها وتم عزلى رغم إن نجاح الأغنية المفروض يكون خير على كل صناع الأغنية ولكن لأن فكرتها مهمة إتاخد منى مواقف كتير !! وكأنه عقاب ودفعت التمن لوحدى !!! هى دى الحكاية بإختصار جدا بس أنا محترف ومتعود على كده بعد كل نجاح زياده !! بس أوعدكم بكام أغنية لكام مطربة مش منهم الفترة الجاية إن شاءالله وأعوضكم كل فترة الصمت اللى ماكانتش بإيدى".
