ويتر حفلة تامر عاشور يكشف تفاصيل أزمته: الدنيا اتقلبت عليا|خاص
تحولت لحظة عفوية خلال حفلة تامر عاشور إلى أزمة كبيرة في عمل أحد الويترز، بعدما ظهر في فيديو متفاعلًا مع أغنية خلال الحفل، ليتفاجأ بعد ذلك بمنعه من دخول الفندق ووضع اسمه على قائمة الممنوعين، بحسب روايته.
طه ناير يكشف تفاصيل أزمته بعد حفل تامر عاشور
وقال الويتر في حوار خاص لـ"كارافان": "كنت شغال في الحفلة تبع إدارة الفندق وماسك الـVIP، وكان آخر الحفلة وكنت مطحون من الشغل جدًا، وتامر عاشور مطربي المفضل، فيدوبك تفاعلت معاه في أغنية لمستني".
وأضاف: "حد من غير قصد من الجمهور شافني وصورني، وصورني وأنا مبسوط، مش أذي ليا. فلما صورني عنده بعد الحفلة ما خلصت وشيرها، وبعد ما شيرها الدنيا اتقلبت في الفندق".
وأوضح أن إدارة الفندق كانت تشيد بأدائه قبل انتشار الفيديو، قائلًا: "قبل ما الفيديو ده حد يشوفه، إدارة الفندق كانت مبسوطة مني جدًا وشكرتني جدًا على مجهودي وإخلاصي".
وتابع: "بعد ما الفندق شاف الفيديو بلغوني إني مش هخش الفندق تاني، وحد من صحابي كلمني الأول قالي الدنيا مقلوبة عليك وتقريبًا هيتعملك بلاك ليست من الفندق، وحد كلمني من إدارة الفندق قالي إنت اتعملك بلاك ليست عشان أسأت لينا وأسأت للفندق".
وكشف الويتر أنه توجه إلى الفندق في اليوم التالي لمحاولة معرفة موقفه، قائلًا: "أنا روحت تاني يوم، مسكتش، ده أكل عيشي ولازم أتمسك بيه، طب أنا عملت إيه غلط؟ روحت تاني يوم والكاميرات شاهدة، وداخل من على البوابة الأمن مرضيش يدخلني عشان اسمي مكتوب على البلاك ليست".
وأضاف: "حاولت وأنا داخل برا البوابة إني أتواصل مع كله، مفيش حد بيرد، فاستعوضت ربنا ومشيت".
وعن طبيعة عمله، أوضح: "أنا مش موظف في الفندق، أنا معنديش عقد، أنا شغال بالبطاقة، حاجة اسمها كاجول، والفندق طلع بيان إني مش موظف في الفندق، طب ما أنا أصلًا قايل إني شغال بالبطاقة".
وأشار إلى حجم المجهود الذي بذله يوم الحفل، قائلًا: "أنا لما أكون شغال من 10 الصبح وعلى سفر، أنا مكنتش بايت في الساحل. أنا جيت من القاهرة، صليت الفجر وتوكلت على الله وروحت الفندق في الشيخ زايد، فأنا تعبت 24 ساعة شغال".
كما كشف عن تواصل أحد أفراد فريق تامر عاشور معه، قائلًا: "في حد من فريق تامر عاشور اتواصلت معايا وقالت ابعتلي فويس باللي حصلي، وبعتلها، بس لحد دلوقتي مردتش، والموضوع عدى عليه أربع أيام".
وأكد في ختام حديثه أنه لا يرى أن لديه إجراءً واضحًا يمكنه اتخاذه، قائلًا: "للأسف مفيش إجراء أقدر أخده، أنا راجل شغال بالبطاقة، هما اللي ممكن ياخدوا إجراء ضدي، أنا سمعت إنهم ممكن يقاضوني إني بشهر بالفندق، طب أنا فين حقي وفين اللي في ظهري؟ أنا راجل فاتح بيت ومسؤول وباكلها بالحلال، ومواطن مصري شغال وشقيان، ففين اللي يدافع عني؟".
