نيجار محمد تعلن القبض على الشخص الذي اتهمته بالنصب عليها: "متشكرة لوزارة الداخلية"
أعلنت الفنانة الشابة نيجار محمد القبض على الشخص الذي سبق أن اتهمته بالنصب عليها، معربة عن سعادتها بما وصفته بانتهاء جزء من الأزمة التي استمرت معها لفترة طويلة، مؤكدة أنها ستتوجه اليوم إلى المحكمة في جلسة الاستئناف، في محاولة للحصول على حقها وتسوية جزء من المبالغ المستحقة عليها.
نيجار محمد تعلن القبض عن المتهم بالنصب عليها
وقالت نيجار في منشور لها: "أحمد اتقبض عليه، وهيعمل النهاردة الاستئنافية عشان أخد حقي وأدفع جزء من الفلوس اللي عليا"، مشيرة إلى أنها لم تكن تتوقع أن تنتهي الأزمة بهذه الطريقة، رغم استمرارها لفترة طويلة.
وأضافت: "قسمت بحياة أمي كنت بعمل الفيديو وشايفة إن مفيش حد هيعمل حاجة، مكنتش متخيلة إن ربنا هيحلها لأن بقالي فترة كبيرة في الموضوع ده"، معبرة عن ارتياحها لما حدث.
ووجهت نيجار رسالة شكر إلى وزارة الداخلية، قائلة: "متشكرة لوزارة الداخلية، شكرًا ومبسوطة، وشكرًا للناس"، معربة عن تقديرها لكل من ساندها خلال الفترة الماضية.
نيجار محمد تخرج عن صمتها
وقالت: "اتكلمت دلوقتي وعملت الفيديو عشان أنا بقالي فترة كبيرة متبهدلة في المحاكم، أخدت أحكام كتير، وأنا اللي دايمًا بحضر، وهو حتى مبيحضرش، وبيبعت المحامي بتاعه، وبعد كده لقيت نفسي مش عارفة أنفذ أي حاجة، يعني أنا واخدة حكم، وهو عمل أجل للسداد، يعني معترف إنه خد الفلوس، وبرضه الحكم مش بيتنفذ".
كشفت الفنانة الشابة نيجار محمد في تصريحات سابقة لـ"كارافان" سبب خروجها للحديث عن أزمة تعرضها للنصب بعد مرور عام على بدء الإجراءات القانونية، مؤكدة أن عدم تنفيذ الأحكام الصادرة لصالحها دفعها لكسر صمتها.
كما وضحت تفاصيل تعرفها على الشخص المتهم بالنصب عليها، مؤكدة أن أحد الممثلين كان حلقة الوصل بينهما، لكنه ابتعد عن الأمر بعد وقوع الأزمة.
وأضافت: "هو أساسًا اللي كان معرفني عليه ممثل ،بدون ذكر أسماء، وكان هو اللي متوسط بينا، لكن لما حصل موضوع النصب، الممثل قالي: أنا مش هدخل في حوارات ومشاكل، ومكنتش أعرف إنه كده، وربنا معاكي".
تحدثت الفنانة الشابة نيجار محمد، عن تفاصيل القضيتين اللتين أقامتهما ضد الشخص المتهم بالنصب عليها، موضحة أن إحداهما صدر فيها حكم، بينما لا تزال الأخرى منظورة أمام المحكمة.
واستكملت: "الموضوع كان في قضيتين، الأولى خاصة بفلوس سلف ولسه في المحكمة، والتانية خاصة بعربيتي، ودي اتحكم فيها، وقت بيع العربية اداني نص الفلوس، وقال هيجيب الباقي بعد أسبوع، لكن لا رجع باقي تمن العربية ولا الفلوس السلف".
وأختتمت: "روحت قعدت مع باباه ومامته في البيت، وباباه فضل يقولي لمدة شهرين: هنخلص الموضوع ومترفعيش قضية، لكن بعد كده عرفت إنه كان بيجهزله ورق عشان يسفره الأردن، وهو ناصب على ناس كتير من الوسط الفني، مش أنا بس، ولحد دلوقتي، بعد ما نشرت الفيديو، محدش تواصل معايا".
