صفاء جلال تكشف أسرار رحلتها من الثانوية العامة إلى عالم التمثيل| حوار
كشفت الفنانة صفاء جلال عن أبرز المحطات في حياتها الشخصية والفنية، وتحدثت عن تفاصيل دخولها مجال التمثيل، وتجربتها في مسلسل "سابع جار"، وعلاقتها بعدد من نجمات الوسط الفني، إلى جانب كواليس تعاونها مع الفنانة القديرة سميحة أيوب، وذلك في حوار خاص مع موقع كارافان.
س: كيف غيّرت نصف درجة في الثانوية العامة مسار حياتك؟
ج: أنا كنت طالبة مستهترة مكنتش دحيحة بس كنت بتنطط ومش بذاكر جامد فجبت سنتها 72.5% وده مكنش قليل في أوائل التسعينيات وسياحة وفنادق كانت بتاخد من 73% فالحياة ودتني حتة تانية وروحت تربية، وأنا كنت بعشق مدرسة الإنجليزي بتاعتي، وروحت كلية تربية ولقيت العيال دحيحة أوي وبعدين لقيت العيال بتوع تجارة لطاف اوي بيطلعوا رحلات فقعدت معاهم لحد ما سقط واترفدت وبعدين خدت الملف وروحت كلية تجارة وبعدين سبتها ودخلت اداب اجتماع وصحابي بتوع المسرح كانوا بيقولوا ليا تعالي مثلي اقولهم انا مبعرفش أمثل، انا كنت داخلة تربية انجليزي عشان لو حبيت اشتغل مضيفة طيران ابقي معايا لغة، وبعدين قعدت سنتين في أداب لحد ما في واحدة صاحبتي راحت تعمل كاستنج لإعلانات وروحت معاها والمخرج الله يرحمه جورج دوس من الناس اللي ليها فضل كبير بعد ربنا سبحانه وتعالى أن أنا ابقي ممثلة، وأستاذ جلال الشرقاوي الله يرحمه له فضل كبير بعد ربنا وروحت عملت بروفة.
س: ماذا يمثل لك دورك في "سابع جار"؟
ج: سابع جار محطة مهمة من محطاتي الفنية ومسلسل مختلف والشخصية سلاح ذو حدين، لأن خلفية البنت مش كويسة بس هي عايزة تبقي كويسة فلما راحت عند اللواء هما الاتنين عالجوا بعض علاقة إنسانية راقية جدا علاقة أبوة، وأستاذ أسامة ربنا يديله الصحة كان لذيذ جدا ويناكفني طول الوقت حتي ورا الكاميرا فسابع جار من المسلسلات المهمة جدا وقدر يوصل للجيل الجديد.
س: من الأقرب إليكِ في الوسط الفني؟
ج: أنا بيتوتاية اوي بس في ناس بحبها اوي على المستوي الإنساني نجمات كبار النجمة العظيمة سوسن بدر والنجمة الجميلة صفاء الطوخي والجميلة سلوي عثمان ووفاء صادق رانيا محمود ياسين، ورانيا فريد شوقي بحبهم لما بنتقابل بتبقي علاقتنا طيبة، وبحبهم على المستوي الإنساني وعلى المستوي الفني هما نجمات كبار ليقدموا أعمال عظيمة.
س: من تشبهك أكثر من ابنتيكِ؟
ج: سلمي شبهي في الشخصية اكتر لكن كارما زي باباها بضبط
س: كيف استقبل والدك دخولكِ مجال التمثيل؟
ج: بابا الله يرحمه في الأول كان مش فاهم الموضوع ومش شايف أنا هعمل إيه أو هحقق إيه، لحد ما جه حضر المسرحية وشافني وانا بمثل في التلفزيون وشاف بعض الاعلانات في الاول فإقتنع.
س: كيف كانت كواليس "جروب العيلة" مع الفنانة الراحلة سميحة أيوب؟
ج: أستاذة سميحة إحنا اشتغلنا مع بعض الضوء الشارد وكانت بتحبني علاقتنا كانت طيبة، وبعدين اشتغلنا مع بعض زهرة الصبار وفي ناس كتير مشافتهوش فلما جينا في جروب العيلة هي كانت ست جميلة ومحترمة جدا وملتزمة، ومينفعش حد يروح يصور معاها مشهد مش حافظ اوي ومتتأخريش وهي بتتحول لوحش قدام الكاميرا كانت عظيمة.
