بعد أسبوع من رحيله.. كلمات مؤلمة من ابنة محمد مرزبان
أعربت ابنة الفنان محمد مرزبان عن حزنها العميق لفقدان والدها، وذلك بعد مرور أسبوع على رحيله متأثرًا بإصاباته جراء حادث سير مأساوي، وأكدت أنها ما زالت غير قادرة على استيعاب خبر وفاته، مشيرة إلى أن صدمة الفراق لا تزال تسيطر عليها حتى الآن.
كلمات مؤثرة
وكتبت على صفحتها الرسمية فيسبوك: "يا بابا عدى أسبوع من ساعة ما مشيت، ولسه مش قادرة أصدق إن دي الحقيقة. لسه مستنياك تدخل من الباب أو أسمع صوتك بتناديني. مش قادرة أستوعب إني مش هشوفك تاني ولا هسمع صوتك إلا في الصور وvoice notes اللي بقيت بسمعها كل يوم و اسمع نصايحك ليا و "صباح الفل يا شهوده" عشان أصبّر نفسي".
بتمني يكون كابوس
وتابعت: "كل يوم بصحى من النوم بتمنى إنه يكون كابوس وإن مفيش حاجة حصلت و اشوفك تاني. كان نفسي تقوم بالسلامة و تشوف حب الناس من اللي تعرفك واللي متعرفكش، وكان نفسي تسمع الكلام الحلو اللي بيتقال عليك من كل الناس ، والناس اللي وقفت جنبنا ومعانا وبتعمل ده من حبها فيك، وقد إيه سيرتك طيبة و حلوه احنا عشنا ولسه وهنفضل عايشين متشرفين إنك أبونا.
كان نفسي في حاجات كتير أوي لسه نعملها مع بعض؛ خروجات، وسفريات، وقعدة البيت ناكل على سفرة واحدة، وحسن وحمزة يصدعوك من كتر الكلام، وفرح Jessy وAhmed، وفطار يوم الجمعة بعد الصلاة، قعدتنا نتفرج علي فيلم و نتجمع نتفرج علي ماتش و حاجات كتير أوي اوي اوي".
وأختتمت: “مشيت وسيبت فراغ كبير أوي قلبي واجعني يا بابا. بس أنا حلمت بيك واطمنت إنك بخير وفي مكان أحلى بكتير، وربنا بعتلنا علامات كتير تطمّنا عليك يا حبيبي. كان نفسي أقولك كل يوم إني بحبك. كان نفسي أحضنك وأبوسك كل يوم. كان نفسي أقولك كل يوم إنك أعظم أب في الدنيا. بس انا هفضل كل يوم ادعيلك و احاول اكون نسخه تانيه منك و اعمل الحاجات الحلوه و الخير اللي كنت بتعملها، و اربي عيالي انهم يبقي شبهك و زيك. بحبك اوي يا حبيبي يا روح قلبي. و ان شاء الله نتقابل في الجنه. الله يرحمك يا حبيبي”.
