تستحق لقب نجمة مصر الأولى.. محمد سيد بشير يُشيد بـ مي عمر بعد نجاح "الست موناليزا"
حرص المؤلف والكاتب محمد سيد بشير، على الإشادة بالفنانة مي عمر بعد تعاونه معها في مسلسل “الست موناليزا”، والذي حقق نجاحًا كبيرًا عقب عرضه منذ بداية شهر رمضان وحتى النصف الأول من الشهر، ويترقب الجمهور الحلقة الأخيرة من المسلسل والتي تُعرض مساء اليوم.
وأشاد محمد سيد بشير ووجه لـ “مي عمر” رسالة عبر حسابه الرسمي على موقع الصور والفيديوهات الشهير “إنستجرام”، وعلق قائلا: “تستحق لقب نجمة مصر الأولى، ومتربعة على القمة بالأرقام قبل الكلام، اشتغلت مع نجوم ميجا ستار كتير جدًا، والحمد لله كان ليا الشرف، لكن مي مختلفة فعلًا، ومش محتاج أقول ده دلوقتي لأن مسلسلنا مكتسح قولًا وفعلًا وأرقامًا، وخلصنا تصوير رغم ظروف كانت صعبة جدًا”.
وعن سبب إشادته بالفنانة مي عمر رغم عمله مع كبار النجوم قبلها، أوضح كاتبًا: “مي عمر نجمة دؤوبة بمعنى الكلمة، لا تكل ولا تمل، عندها وعي وإدراك بكل تفصيلة تخص العمل: دراميًا، إخراجيًا، تصويرًا ومونتاجًا. مش مجرد بطلة بتيجي تقول دورها وتمشي، لكن شريكة حقيقية في النجاح”.
وأضاف: “في البداية كانت الأمور طبيعية، بشتغل وببعت حلقات. لكن اكتشفت إن معايا نجمة عايزة تنجح بجد… عايزة تكسر الدنيا بجد. بتقف عند كل حرف، كل كلمة، كل سطر. تسأل، تناقش، تراجع، وتدور على الأفضل”.
واستكمل حديثه: "فترة الكتابة رغم سفرها، كان عندنا ميتنج يومي بالساعات — ممكن يوصل لعشر ساعات بنقرأ حلقة حلقة، مشهد مشهد. ولما كنت بتعب كانت تقول لي بحماس: “شد حيلك يا بشير… عشان نقعد في رمضان نرتاح وإحنا ناجحين ومكسرين الدنيا، وقد كان”.
وتابع: “وحتى أيام التصوير نفسها، كنا بنقعد على المشاهد، نقرأها سوا، ونطوّرها، ونفتّش في كل إحساس وتفصيلة، ورغم إن ده مش دايمًا طبعي إني أقعد أشتغل على المشاهد وقت التصوير، لكن حماسها، وحبها للشغل، وشغفها الحقيقي بالنجاح، جددوا شغفي أنا كمان. خلّوني عايز أطور الشغل أكتر وأكتر… وأوصل بكل مشهد لأفضل نسخة ممكنة”.
وتحدث عن التجربة ومدى صعوبتها عليه وعلى فريق العمل، قائلا: “التجربة خارج منها رغم صعوبتها وقسوتها، إصابة أستاذة سوسن، وفقدان والد مي أثناء التصوير، لكن عمرها ما حسستنا إننا انكسرنا أو هننهار. بالعكس، كانت هي اللي بتقوينا، وتشدنا نكمل اليومين اللي فاضلين، وتنزل الشغل رغم إن من حقها الكامل تحزن”.
واختتم منشوره، قائلا: “كل الكرو شاف بطلة حقيقية… قدام الكاميرا ووراها، بطلة متحمّلة مسؤولية مشروع وراه فريق كامل، والتزامات تسليم وعرض مباشر على الهواء، مي تستاهل النجاح… وتستاهل أكتر منه بكتير، مليون مبروك ليكي ولينا نجاحنا، ومبروك الأعلى مشاهدة على منصة شاهد من أول رمضان لحد دلوقتي… ولسه مكملين الست موناليزا”.
