أحمد العوضي: مهتم بالطبقة الشعبية في أعمالي لأن واحد منهم.. وأنا تربية نور الشريف
كشف النجم أحمد العوضي تفاصيل جديدة عن تحضيراته لمسلسل «علي كلاي»، مؤكدًا أن الاستعداد البدني بدأ قبل انطلاق التصوير بفترة طويلة، نظرًا لعشقه لرياضة الملاكمة التي يمارسها منذ سنوات، موضحًا أنه يحرص على ممارسة الرياضة يوميًا منذ طفولته.
وقال أحمد العوضي في تصريحات خاصة لبرنامج «رمضان ويانا» على إذاعة نغم إف إم، الذي تقدمه الإعلامية أميرة نور، نستعرضها من خلال ما يلي:
- استعدادي البدني لدوري بمسلسل «علي كلاي» بدأ قبل العمل بكثير، لأن رياضة الملاكمة رياضتي المفضلة منذ وقت طويل.
- كل يوم في حياتي بلعب رياضة من وأنا صغير.
- التحضير الحقيقي لمسلسل «علي كلاي» كان التحضير النفسي ومذاكرة الشخصية، لأن العمل فيه تحولات نفسية كبيرة ولسه هنشوف في اللي جاي.
- بعد نجاحي في «حق عرب»، ثم «فهد البطل»، سمعت آراء من البعض بتقول إني مش هنجح في اللي جاي، وده بيكون تحدي بالنسبة لي في اختيار فكرة جديدة تحافظ على حسن ظن جمهوري وإخواتي فيا، وكمان للرد على الآراء السلبية، ولازم العمل الجديد الناس تحبه أكتر من اللي قبله
- بطبيعتي مهتم بالطبقة الشعبية جدا، لأن أنا واحد منهم، وأحب أقدم المسلسلات اللي أنا كأحمد أحب أتفرج عليها من وأنا صغير، وفيها عيلة ودفء المناطق الشعبية، وخطوط ملحمية متشابكة.
- وجود نجوم مسلسلات زمان في مسلسلاتي زي أحمد عبدالعزيز، وطارق الدسوقي، والشحات مبروك وبسام رجب، وغيرهم، نابع من حبي وتعلقي بيهم من وأنا طفل، وحبهم لسه جوايا وكان حلمي أشتغل معاهم.
- اتربيت على أعمال عظيمة زي ذئاب الجبل، والمال والبنون، ومين ما بيحبش فاطمة، وبحب النوعيات العظيمة دي من الأعمال، ولسه متأثر بيها.
- أنا تربية النجم الكبير نور الشريف، ولما ربنا أراد أبقى نجم، دوري أكتشف ناس جديدة وأديهم فرص ويبقوا نجوم، ودي حاجة أنا اتعلمتها منه.
- سعيد بالفنانة يارا السكري وأدائها معايا في «علي كلاي»، ودي أول بطولة ليها بعد عملها معايا السنة اللي فاتت في فهد البطل، والناس فرحانة بيها، وكمان رحمة محسن غنت في مسلسل السنة اللي فاتت والسنة دي بتمثل.
- بحب فكرة العيلة في أعمالي، وتواجد الناس اللي بحبها، زي عصام السقا اللي بعتبره أخويا وأنتيمي، وبرتاح في الشغل معاه، والسنة دي لأول مرة أعداء.
- سعيد بعملي مع درة وانتصار وريم سامي، وفخور بيهم.
- غنيت لأول مرة السنة دي، والحمد لله الأغنية بقت ترند، وسمعت الأغنية أول مرة وأنا راكب العربية، بس أنا دندنت شوية مش مطرب يعني.
