"ما طلبتش منه يشيل منع السفر عن ابنه".. رنا طارق زوجة محمود حجازي ترد على اتهاماته لها

ردت رنا طارق على ما وصفته بـ«الاتهامات المتكررة» من زوجها محمود حجازي، مؤكدة رغبتها في توضيح عدد من النقاط المتعلقة بالخلافات بينهما والقضايا المتداولة أمام القضاء، واستهلّت بيانها بقولها: "للأسف لازم كل يوم ألاقي اتّهام جديد صادر منه، وحابة أوضّح كام نقطة مهمة".

وقالت في بيان توضيحي، تطرقت فيه إلى مسألة منع سفر ابنها، قائلة: "أولاً: "هو بيقول إن مهما حصل مش هيشيل منع السفر، أنا عمري ما طلبت منه يشيل منع السفر، وابنه ده مش عايش معاه، ولا هو مسؤول عنه، ولا بيسأل عليه، ولا بيصرف عليه، وبقالّي 5 شهور عايشة مع ابني في مكان تاني في مصر، بصرف على نفسي وبصرف على ابني لوحدي".

وأضافت في السياق نفسه: "ولو كنت عايزاه يشيل منع السفر، كنت أخدت الديل اللي عرضه عليّ من كام شهر لما طلب مني فلوس مقابل إنه يشيله، وأنا كنت ممكن أدفع له الفلوس دي، ما أنا ياما صرفت، أنا قاعدة في مصر علشان قضية الضرب بتاعتي، علشان آخد حقي بعد ما إدّاني علقة موت لما واجهته بالعلاقات النسائية، وعندي جلسة يوم 21 فبراير".

زوجة محمود حجازي: حضرت إلى مصر بكامل إرادتي 

وأكدت أنها حضرت إلى مصر بإرادتها الكاملة، موضحة: "أنا جيت مصر بإرادتي وجبت له ابنه، وأنا متحمّلة كل المصاريف علشان يشوف ابنه، وعلشان أهله يشوفوه، هو نفسه كان عاملي بلوك وأنا في أمريكا، ومبيسألش على ابنه، ده حتى أنا عاملاله فيزا لأمريكا بـ 5 سنين، وهو مجاش يشوف ابنه، وبرغم كده جبتهوله على أمل إنه يفوق ويتغيّر".

وفي ما يتعلق بطلبها الطلاق، أوضحت: "ولما واجهته وطلبت الطلاق، اعتدى عليّا وكنت هموت، ولما وقّفت إجراءات الجنسية لِيه ده ضايقه أكتر مني".

وعن مسألة رؤية أهل الزوج للطفل، ذكرت: "ثانيًا: هو بيقول إن أهله مشفوش ابنه، أنا عمري ما منعت حد منهم يشوف الولد، بعد ما ضربني، قلت لهم إني مقدرش أجيب ابني في بيوت أو أماكن مُغلقة وهو موجود، خوفًا إنه يتعدّى عليّا تاني، وخوفًا على ابني منه، وأهله مش بيقدروا عليه، وهو قالّي إنه ملوش كبير، وهما بنفسهم بيشتكوا منه وبيقولوا إنه بيتصرّف من دماغه وإنه عصبي جدًا، فإزاي أروح برجلي للشقة اللي كنت هموت فيها؟، قلت لهم أهلاً وسهلاً في أي مكان عام، وهما رفضوا واختفوا".

وتابعت في السياق ذاته: "مافيش أي محاولة منه إنه يشوف الولد، ولا حتى يسأل عنه في التليفون".

التمكين من شقة الزوجية وحكم النفقة 

كما تطرقت إلى مسألة التمكين من شقة الزوجية، قائلة: "ولما أخدت قرار تمكين بعد ما طردني من الشقة الزوجية، جاب أهله يعيشوا معاه في الشقة، وهو عارف إن الشقة صغيرة، وعمل كده عن قصد، ولما قلت له نعيش مع بعض علشان ابنك، قال: لأ.. خليكم في أمريكا، لإنه ببساطة مش عايز مسؤوليتي ولا مسؤولية ابنه".

وكشفت عن حصولها مؤخرًا على حكم نفقة، مضيفة: "من كام يوم أخدت حكم نفقة لابنه، والنفقة بترجع لسنة كاملة وده أقصى حاجة في القانون لإنه ماصرفش على ابنه من يوم ما اتولد من سنة ونص، والحكم ده دليل واضح إنه ماصرفش ولا مليم على ابنه".

وفي ما يخص القضايا المنظورة، أوضحت: "أما قضية الضرب بتاعتي، فكانت موجودة قبل موضوع الفتاة النمساوية، واتواجه له الاتهام، وخرج بكفالة على ذمّة القضية، وأنا مش محتاجة أضغط على حد، ولا أعمل حملات، ولا أدفع لحد، أنا صاحبة حق".