شقيق شيرين عبد الوهاب: 90% من الأخبار المتداولة عنها مغلوطة والناس بتتاجر بأزمتها
خرج شقيق الفنانة شيرين عبد الوهاب عن صمته، ليرد بقوة على ما يتم تداوله خلال الأيام الماضية من أخبار وتصريحات وصفها بالمغلوطة وغير الصحيحة، مؤكدًا أن هناك حالة متعمدة من المتاجرة بأزمة شقيقته، وتشويه كل من يحاول الوقوف بجانبها بصدق، مشددًا على أن ما يُنشر في وسائل الإعلام والبرامج لا يمت للحقيقة بصلة، وأن ما يحدث هو حملة منظمة هدفها صناعة اللقطة والتريند فقط، على حد تعبيره.
وأضاف شقيق شيرين عبد الوهاب، في منش عبر صفحته على فيس بوك، كاشفًا كواليس ما جرى خلال سنوات الأزمة، وموضحًا حقيقة ما أُثير حول العلاج، وعربة الإسعاف، ودور بعض الفنانين، والهجوم الممنهج على كل من دعم شيرين فعليًا، مؤكدًا أن الحقيقة الكاملة مختلفة تمامًا عما يتم تداوله.
نص تصريح شقيق شيرين عبد الوهاب
"أقسم بالله العظيم ٩٠٪ من الأخبار مغلوطة وغير صحيحة تمامًا، والناس اللي بتتاجر بيها في البرامج والمداخلات، ولا موضوع “مجموعة فنانين اتحدوا” وكل الهري ده كله غلط. دي ناس عايزة لقطة وتريند مش أكتر. محدش ساعد غير اتنين: أحمد سعد وزينة، وبس، ومحمود الليثي كان كل يوم عندها.
إحنا بقى بعدنا ليه؟ عشان اللي إنتوا شايفينه ده حياتها عبارة عن حرب. إحنا لما دخلنا في ٢٠٢٢ من أربع سنين، اتقال علينا إيه؟ إننا بننهبها ومستفيدين وناس وحشين. طيب ماشي. نجحوا إنهم يبوّظوا علاجها. مين بقى دول؟ طليقها والمحامي بتاعها وسارة الطباخ وأربعين صحفي تحت المستشفى. تمام، بعدنا، ونجحوا إن علاجها يبوظ.
حلو. بعد أربع سنين ناس تانية غيرنا، أهم فنانين ومعروفين وملهمش مصلحة. اللي بيدوّر معاهم جاب كل تاريخهم القديم، ودول كذا وكذا، وإزاي دول اللي يعالجوها؟ مين بقى اللي ليه مصلحة يطلع يشوّه الناس دي زي ما شوّهنا من قبلهم؟ واللي طالع يقول مش صح إنها تروح بيت صاحبتها، كله بيتاجر. عرفت منين حضرتك إنها راحت عندها؟ ومتأكد أوي؟
موضوع بقى عربية الإسعاف: زينة عدّت عليها يوم، قلتلها أنا حاسة إني تعبانة، قلتلها مستشفى الجوي أهي قريبة يلا بينا. راحت واطمنت عليها، وهما هناك الدكتورة طلبت منظار، خدت بنج، وما كانتش قادرة تركب العربية، خدوها بسيارة إسعاف لحد بيتها. دي كل الحكاية.
الصحفيين بتوعنا المحترمين بقى عرفوا إزاي؟ عشان بيجندوا ممرضين في معظم المستشفيات والمحاكم والنيابات: تشوف حد مشهور عرفني بس وليك الحلاوة. وبس، وكله بقى كتب وألف على مزاجه.
ليه بقى تحديدًا الاتنين دول واقفين جنبها بجد؟ عشان دول عشرة العمر، نعرف بعض من قبل ما حد فيهم يبقى معروف من زمااااان. عشرة وستر وغطا وحاجات كتير أوي. أي حد تاني بقى كله بيتاجر بيها.
الناس دي بقى دلوقتي هتزعل مني جدًا عشان ما كانوش عايزين حد يعرف أي حاجة عشان ما يتفهموش غلط، بس اللي حصل من أهل الشر إيه؟ على الناس دي حملة ممولة على كل المنصات، مدفوعة، إن الناس دي وحشة ومينفعش دول يبقوا جنبها.
دي كل الحكاية. أي حاجة برّه الكلام ده أقسم بالله هري".
