أمينة خليل: "أهلي ما ضغطوش عليا أتجوز.. والاختلاف بيني وبين زوجي سر نجاح علاقتنا"

كشفت الفنانة أمينة خليل عن تفاصيل حياتها الخاصة، متحدثة عن دعم عائلتها المستمر، وعلاقتها بزوجها المصور أحمد زعتر، مؤكدة أنها لم تتعرض يومًا لأي ضغط من أسرتها بشأن الزواج، وهو ما اعتبرته أحد أهم أسباب توازنها اليوم.

وقالت أمينة: "إن أهلي مكنوش بيزنوا عليا علشان أتجوز، وفعلًا أنا محظوظة أن أهلي مختلفين وده اللي ساعدني أبقى البني آدمة اللي عليها دلوقتي، مفهوم الحب اتغير عندي وبقى أعمق، وكنت فاكرة أني عايزة حد شبهي وشبه تفكيري، وبعدين اكتشفت أن شريك حياتك ممكن يبقى عكسك، أنا شخصية عفوية ولكن مش همجية، وقابلت الشخص اللي حاسة أنه شبهي والعلاقة ممشيتش خالص، فقلت أني عايزة حد أساسياته شبهي بس شخصيته مختلفة، وأحمد جوزي راكز وقليل الكلام وتقيل، وأنا وصلت لمعادلة لما أدخل في قصة حب مديش قلبي كله".

وأضافت الفنانة أمينة خليل: "أنا بحب الحب، ومش لازم يكون حب لـ راجل ممكن يكون لعيالك وأهلك وشغلك، وعمري ما حسيت بـ جنون العظمة، وأنا ضد مبدأ أن الفنان يتحط في قالب معين ويتعامل بطريقة معينة، وبتعمد أني أقول رأيي، والناس بتستسهل أنها تحكم على بعض وده شيء بيعصبني جدًا، ليه بنحكم على بعض؟".