القصة الكاملة لمرض ابنة الفنان شريف عواد وزوجته تكشف تفاصيل الأزمة وتنتقد إهمال الأطباء
كشفت بهية زوجة الفنان شريف عواد عن تعرض ابنتهما شروق لأزمة صحية خطيرة بعد إصابتها بنزيف في المخ، معربة عن استيائها من الإهمال الطبي الذي واجهته خلال محاولاتها المتكررة لتشخيص حالتها.
وكتبت بهية عبر حسابها على موقع «فيسبوك»:«شروق شريف عواد، ابنتي وابنة الفنان شريف عواد، يوم الجمعة اللي فاتت فجأة بدأت تصرخ وتقول عندي صداع جامد ومش شايفة بعيني. خدها والدها بسرعة لأقرب مستشفى في الهرم، وهناك قاسوا ضغطها ولقوه واطي، علقوا لها محاليل وسألوها: "حد مضايقك؟"، ولما قالت لأ، قالوا لها روحي نامي».
وأضافت:«أبوها قلق ووداها مستشفى تانية في العجوزة، وهناك قالولها نفس الكلام: انتي بتدلعي! من غير ما يعملوا أي فحوصات أو حتى يقيسوا الضغط. وتاني يوم الصبح صحت وهي في حالة أسوأ، الصداع مخلصش وحركتها بقت صعبة، فخدناها مستشفى ثالثة، وهناك أصر أبوها يعملها رسم مخ، وبعد الأشعة المقطعية اكتشفنا إن عندها نزيف في المخ، ومن ساعتها وهي في العناية المركزة بقالها أسبوع».
وتابعت بهية في منشورها:«المحزن إن الدكاترة بيتعاملوا مع الشباب إنهم بيتدلّعوا، ولو كنا صدقنا كلامهم وممشيناش ورا إحساسنا، ربنا وحده يعلم كان ممكن يحصل إيه. أنا قلقة على بنتي جدًا، وهي كمان خايفة عليّ عشان مش ماشية في مشوار علاجي من السرطان. حياتي كلها متعلقة بيها، وربنا وحده القادر يحلها».
