عمرو سلامة: أزمة شمس الزناتي 2 في طريقها للحل
كشف المخرج عمرو سلامة عن مستجدات أزمته مع الشركة المنتجة لفيلم "شمس الزناتي 2"، موضحًا أن الأمور بدأت تسير نحو الحل بعد تدخل النقابة بشكل فعّال.
وقال سلامة في لقائه مع ET بالعربي: "المشكلة في طريقها للحل، والنقابة خدت موقف كويس جدًا، وهي خطوة هتؤدي لنتائج إيجابية، وأنا حاليًا مستني قرار النقابة والحكم القضائي".
وأوضح المخرج أن الأزمة في جوهرها إنتاجية ومادية، قائلًا: "الشركة المنتجة ما التزمتش بتعاقدها معانا، وأنا اتكلمت علشان أحذر زمايلي، لأن محدش حذرني قبل ما أبدأ أنا وباقي طاقم العمل، ومخدناش مستحقاتنا، فالموضوع مادي بحت".
وأضاف سلامة: "من الناحية القانونية، المخرج الجديد صور من غير ما ينهي اتفاقه مع المخرج الأول، وده مخالفة لحقوق الملكية الفكرية والأدبية، لأنه ما ينفعش يصور بمخرج تاني من غير موافقة المخرج الأول، ومشكلتي مش مع المخرج أحمد خالد موسى، لكن مع الشركة المنتجة".
وعن استبداله بالمخرج أحمد خالد موسى، قال: "من حق أي مخرج يغيّر الكاست أو يختار الممثلين اللي شايفهم مناسبين، واللي عرفته إنهم مش هيستخدموا أي مشاهد من تصويري، وأتمنى إن ده فعلاً اللي يحصل".
واختتم سلامة حديثه مؤكدًا علاقته الجيدة بالنجم محمد إمام: "أنا ومحمد حاولنا نحل المشكلة وديًا، وعلاقتنا ممتازة، وبتمنى له كل الخير، وإن الفيلم ينجح ويكسر الدنيا، ويا رب الأزمة دي تخلص ونشتغل سوا في أفلام جاية".
