بسبب منتخب إيران.. عمرو محمود ياسين يقاضي سيدة بعد إساءتها له
أعلن السيناريست عمرو محمود ياسين، اعتزامه اتخاذ الإجراءات القانونية ضد سيدة بسبب إساءتها له عقب تصريحاته بشأن مباراة مصر وإيران، وتعاطفه مع لاعبي المنتخب الإيراني ودعمه.
منشور عمرو محمود ياسين
وكتب عمرو محمود ياسين، عبر حسابه الرسمي بـ فيس بوك: أستاذة محترمة هرفع عليها قضية إن شاء الله، هي وكل أصحاب التعليقات المسيئة.
تصريحات عمرو محمود ياسين عن مباراة مصر وإيران
و علق السيناريست عمرو محمود ياسين، على أحداث مباراة منتخب مصر وإيران، عبر حسابه على فيس بوك قائلا: اللحظات اللي عاشها لاعبي وجمهور المنتخب الإيراني بجد ربنا ما يوريها لحد، إحساس صعب جدًا ومؤذي نفسيًا بشكل رهيب، ده تلاعب بالجهاز العصبي والنفسي للإنسان، الناس بتلعب ضدي لكن حقيقي صعبوا عليا وتعاطفت معاهم وأتمنى صعودهم.
عمرو محمود ياسين يشيد بصعود منتخب مصر
وفي منشور آخر، انتقد عمرو محمود ياسين محاولات بعض الأشخاص التقليل من أهمية الإنجاز الذي حققه المنتخب المصري بتأهله إلى دور الـ32.
وكتب عمرو محمود ياسين: “في ناس شغلتها في الحياة إنها تقلل منك ومن إنجازاتك… أو حتى تقلل من نفسها ومن إنجازاتها بسبب شعور داخلي بالدونية .. إحساس كده إنك قليل .. فتبقى عايز تشد أي حاجة حلوة لتحت. وفي ناس دلوقتي عايزة تقلل من حجم إنجاز صعود مصر لدور الـ32. الصعود اللي كل المنتخبات اللي وصلت له احتفلت وفرحت وهدت الدنيا من الفرحة… نيجي عندنا إحنا ونقول لا مش إنجاز .. أصل كأس العالم السنة دي 48 فرقة! و احنا تصنيفنا 26 فا عادي نطلع الدور ال 32”.
وتابع عمرو محمود ياسين: “طب حضرتك هو أنا مش متأهل من مجموعة فيها منتخبات بتتواجد في كأس العالم عادي؟ مش المنتخبات دي حاربت و قاتلت عشان توصل برضه ؟؟ في 2018 كان فيه مجموعات فيها كولومبيا واليابان والسنغال وبولندا .. وكلها مش منتخبات قوة عظمى بغض النظر عن التصنيف كل واحد كان pot كم بس في الاخر ماهياش قوى عظمى .. كانت مجموعة عادية جدًا .. و لما طلع منها كولومبيا و اليابان كان انجاز بالنسبه لهم. وكان فيه مجموعة فيها البرازيل وصربيا وكوستاريكا وسويسرا. بعيدًا عن البرازيل .. الباقيين مش قوى عظمى في الكورة .. ومع ذلك أي منتخب يتأهل من مجموعة زي دي يبقى عمل إنجاز محترم، وسيبك من أي تصنيف لأن في كأس العالم أحيانا تذوب التصنيفات لأن أغلب الفرق بتقدم أقوى ما لديها عشان ده اكبر محفل رياضي عالمي .. فا بتشوف كاب فيردي و الكونغو و غانا بيتعادلوا ادام اسبانيا و البرتغال و إنجلترا والاكوادور بتكسب المانيا. بلاش ده كله مثلا في 2022 بلجيكا المصنفة مستوى اول و كانت رقم اتنين على العالم خرجت من الدور الأول... اذن مش معنى انك حاجه و عشرين ع العالم و صعدت الدور ال 32 فا انت ماحققتش انجاز!! ده كلام فاضي .. لان التصنيفات لا قيمة لها امام قوة هذا المعترك الرياضي و الدوافع اللي عند كل منتخب !
بلاش بقى شغل التقليل ده عايز تقلل من نفسك؟ قلل عايز تحس إنك صغير؟ دي قصتك. لكن حل عننا".
وأختتم عمرو محمود ياسين:" إحنا عاملين إنجاز .. وإنجاز محترم جدًا صاعدين مركز تاني .. ومتساويين في عدد النقاط مع صاحب المركز الأول .. وقدمنا ماتشات على مستوى عالي .. واللاعيبة تعبت وعرقت وقاتلت ليه الإصرار إننا نخسف بتعب الناس ومجهودهم الأرض؟ ليه لازم أي فرحة عندنا تتاكل؟
ليه لازم أي حاجة حلوة نقلل منها ونكسرها؟
عيب. عيب والله.. و مابقولش اننا نكتفي و مانحلمش بانجازات أكبر .. بالعكس ده اللي لازم يحصل .. بس بقول ... اتقوا الله في الناس اللي تعبت .. واتقوا الله في فرحة الجمهور".
