"ربنا مش بيتعاند".. فاطمة عيد تروي حكاية مؤثرة عن عدم إنجابها للذكور

تحدثت الفنانة فاطمة عيد عن تجربة شخصية مؤثرة في حياتها، كاشفة أنها كانت تحلم بإنجاب ولد نظرًا لأن جميع أبنائها من البنات.

وقالت فاطمة عيد في تصريحات لها لبرنامج "كلم ربنا" على راديو 9090، مع أحمد الخطيب: "عشت طول عمري أحلم بإني أخلف ولد علشان خلفتي كلها بنات، كان نفسي دايما في ولد، وكتير دعيت ربنا وطلبت منه يكرمني بالولد، لدرجة إني وقفت الخلفه 7 سنين علشان خايفة من زيادة خلفة البنات، وبعدين تراجعت انا وزوجي وقررت أحمل تاني علشان الولد".

وأضافت أنها عندما علمت بحملها بكت بشدة، قائلة: "لما عرفت إني حامل بكيت بشدة وكلمت ربنا وقلت له: يارب يا مجيب الدعاء، نفسي في ولد، يارب ما تحرمني ويكون إللي جاي ولد، وكانت المفاجأه إن ربنا اعطاني "بنت" برضه للمرة الخامسة".

فاطمة عيد: زعلت لما عرفت إني حامل في بنت للمرة الخامسة 

وأكدت أنها شعرت بالحزن في البداية، قائلة: "زعلت وخدت علي خاطري.. بس حصلت مفاجأه كبيره هي إن آخر عنقود البنات طلعت أفضل بناتي وأشهرهم وأشطرهم وأحن واحده عليا وعلي أبوها.. البنت دي هي المطربة شيماء الشايب".

وأضافت أن هذه التجربة جعلتها تدرك أن الله لا يُعاند، وأنه قد يرزق الإنسان بما لم يكن يتمناه، لكنه يكون الخير الحقيقي له، قائلة: "لما كلمت ربنا فهمت وآمنت إنه مش بيتعاند، رزقني ببنت على غير رغبتي لكن بنت بـ 100 راجل، النهارده أقدر أقول إن لو الزمن رجع بيا كنت طلبت يديني بنتي شيماء، مش عاوزه ولد، لأن عطية ربنا أفضل مليون مرة من طلبي".

وتابعت: "وأنا والله كنت غلطانه وبقول لربنا: حقك عليا.. آسفه مكنتش اعرف إن الخير كله عندك وإنك تعلم اللى انا معلموش واختيارك ليا هو الرضا والحب كله".

واختتمت حديثها بالتأكيد على أن الله لم يخذلها يومًا، وأنه كلما طلبت منه شيئًا أعطاها ما هو أفضل منه، مشيرة إلى أن الرضا بقضاء الله هو أعظم راحة، قائلة: "ربنا بيكلمني زي ما بكلمه علشان هو حبيببي وحبيب عيالي، ومفيش طلب طلبته منه ألا وأعطاني أحسن منه".