فيدرا ترد على باسم يوسف بعد منشوره الأخير: "له دور كبير في تغيير الوعي الجمعي في العالم"

علقت الفنانة فيدرا على ما نشره الإعلامي باسم يوسف مؤخرًا، بشأن رؤيته لضعف فرص تحقيق انتصارات في الصراع الدائر، وذلك عبر حسابها على فيسبوك.

وقالت فيدرا في منشورها: “ردًا على باسم يوسف، اللي أنا بحبه و بشاركه آراء كتير جدا، حتى البوست الأخير اللي كلنا برضه حاسين بيه، و خايفين منه، و أنا منهم، بس برجع خطوات لورا و بشوف صوره اشمل نسبيا، النصر مش دايمًا بيبقى عسكري، النصر له أشكال كتير، وله جبهات كتير، وفي حرب بقالها أكتر من ٩٠ سنة زي الصراع الفلسطيني-الإسرائيلي، كان في ضحايا لا تُعد ولا تُحصى، أطفال، ستات، رجالة، ثمن إنساني فظيع جدًا، ده واقع مؤلم وموجع جدًا”.

وأضافت: "لكن في حاجة تانية حصلت، لسنين طويلة جدًا، العالم كان بيسمع رواية واحدة بس، رواية الإعلام الصهيوني اللي كان مسيطر على الإعلام في الغرب، في أوروبا، في أمريكا، ودايمًا الصورة كانت إن العرب “إرهابيين متوحشين”، وإن إسرائيل “واحة الديمقراطية” في الشرق الأوسط، وإن دي “أرضهم الموعودة”، لكن محدش كان بيحكي إن في شعب اتطرد من أرضه، محدش كان بيحكي إزاي الأرض اتاخدت بالقوة، محدش كان بيسمع صوت الفلسطيني أصلًا، ليه؟، لأن ببساطة ماكانش في منصة، وبعدين جه عصر السوشيال ميديا إنستجرام. تويتر. فيسبوك. تيك توك، وفجأة… الرواية اتغيرت، اللي بيحكي القصة بقى مش موظف في قناة، بقى شاهد عيان من قلب الحدث، فيديو مباشر، طفل بيتكلم، أم بتصرخ، بيت بيتهد، العالم شاف بعينه، ومن هنا حصل تحول ضخم، الرواية التانية اتسمعت واتسمعت بقوة، والوعي العالمي بدأ يتغير، وبدأنا نشوف التغيير ده بيظهر، سياسيين جداد بيتكلموا بشكل مختلف، شخصيات عامة بتغير مواقفها، مشاهير في هوليوود بقوا يتكلموا علنًا، التغيير ده مش هيحصل في يوم وليلة، إحنا عايزينه يحصل دلوقتي فورًا لكن الواقع إن التغيير الاستراتيجي بياخد وقت، في نصر تاني بيحصل، نصر في الوعي، نصر في الرواية، نصر استراتيجي طويل المدى، حتى لو في قيادات دلوقتي بتحاول تعكس الاتجاه، الزمن بيتغير، الجيل بيتغير، واللي جاي مختلف، وده في حد ذاته نصر".

واختتمت حديثها قائلة: "والحقيقة، أن باسم كان له دور كبير في تغيير الرواة و الوعي الجمعي في العالم".