أحمد سعيد عبد الغني يكشف: مراد في "على قد الحب" شرير وطبيعته قريبة من الجمهور

أعرب الفنان أحمد سعيد عبد الغني عن سعادته الكبيرة بمشاركته في مسلسل "على قد الحب"، الذي يشارك في بطولته النجمة نيللي كريم والفنان شريف سلامة، مؤكدًا أنه دائمًا ما يفضل تقديم أدوار الشخصيات الشريرة والمعقدة.

وفي تصريحات إذاعية، قال عبد الغني إن شخصيته في المسلسل، مراد، شخصية شريرة مليئة بالتعقيدات، مضيفًا: "أنا دايمًا بحب أقدم أدوار الشخصيات اللي بتستفزني، وكل ما الشخصية تبقى شريرة أكتر، بحب أمثلها أكتر. إحنا لسه مخلصناش التصوير ولسه في تطورات كبيرة جدًا هتحصل في المسلسل، وهنشوف منه شر أكتر في الحلقات اللي جاية."

وأشار إلى أن التحضير للشخصية يتطلب دراسة دقيقة لكل تفاصيلها: "لازم أفهم تركيبتها كويس جدًا، وأراعي سنها، شغلها، طريقة لبسها، حالتها النفسية، كل التفاصيل الصغيرة دي بتفرق."

وأضاف عبد الغني أن أكثر ما أعجبه في دوره الحالي أنه مختلف عن أي دور شر قدّمه سابقًا، قائلاً: "شخصية مراد شريرة من غير افتعال، ومن غير مبالغة في الأداء، فكان طبيعي وقريب من الجمهور. التعاون مع المخرج خالد سعيد شجعني جدًا، وهو شاطر وبيحب شغله وفاهم تفاصيله كويس أوي."

وتابع: "كل النجوم اللي معانا في المسلسل، سواء نيللي كريم أو شريف سلامة أو مها نصار، كلهم نجوم كبار، وده بيخلينا كلنا نحاول نقدم أحسن حاجة عندنا. الموازنة بين العقل والمشاعر في المشهد صعبة جدًا، وممكن نعيد المشهد أكتر من مرة علشان نوصل لنقطة التوازن."

وعن تفاعل الجمهور، أوضح عبد الغني أن ردود الأفعال زادت بشكل ملحوظ بعد الحلقة العاشرة: "لما حصلت المؤامرة على مريم، أنا بفرح بتفاعل الجمهور وردود أفعالهم. بحب دايمًا إن الجمهور يحب العمل ككل، مش بس الشخصية اللي بقدمها. بالنسبة لي، لما العمل كله ينجح، يبقى أنا نجحت."