بعد نجاح عين سحرية.. شريف دسوقي يستعيد موقف مؤثر لـ عصام عمر
شارك الفنان شريف دسوقي موقفًا مؤثرًا يجمعه بزميله الفنان عصام عمر، وذلك عبر منشور على حسابه الرسمي على فيس بوك، في إطار تهنئته واحتفاله بنجاحات الأخير، ومن بينها مسلسل عين سحرية الذي يعرض حاليًا في موسم رمضان 2026.
وقال شريف دسوقي: "فى سنة 2014، كنا بنقدم عرض أنا وعصام عمر، اسمه المفرمة وزمايلنا فى الوسط الفنى السكندرى، اسلام عوض وكريم عبد النعيم، من اخراج ولدى الغالى حكيم عبد النعيم وكتابته ونادت عادل الأخت العزيزة، وبالمناسبة عصام هوا اللى واقف قصادى فى الصوره اللى خلفيتها سقالات وكنا بنعرض ليلة ضمن ليالى العرض فى مسرح روابط الشهير فى وسط البلد القاعة فووول هاوس وناس كتير جايه تتفرج عشان العرض مسمع وفى مجهود عظيم للممثللين والإخراج وكان بشهادة المتخصصين إن العرض مسابق عصره".
وأضاف شريف دسوقي: "ويقع عصام عمر على قزازة كبيرة وتقطعله ايديه بجرح غاير يملا خشبة المسرح كلها دم وبغزارة كلنا على المسرح والعرض شغال اترعبنا عليه وقعدنا نقوله انا وزمايلى من غير مالجمهور يحس، اخرج ياعصام انت اتجرحت جامد لدرجة أن دمه غرقنا احنا شخصيا واذا بعصام يفاجئنا بأنه يرفض الخروج من المسرح ويصر باصرار ليس له مثيل أنه يكمل العرض والكارثة اننا كنا وصلنا لتلت وقت العرض ولسه فى وقت ياااامه الا انه مصر انه يكمل وفى كامل تركيزه عشان ماياثرش علينا ولا على العرض ووصلنا بشق الانفس الى نهاية العرض وخشبة المسرح واحنا كممثللين متغرقين من دم عصام خرجنا عشان ندخل للخشبه تانى ونحيى الجمهور واذا بعصام يكون جاب اخره ويصرخ صرخه لم اسمعها فى حياتى ونجرى بيه على مستشفى الاسعاف القريبه من المسرح ليدخل قسم الطوارئ سريعا والدكتور أول ماشاف الجرح رعبنا وقالنا ازاى سبتوه لحد ما وصل لكده ده فى قطع كبير فى الشريان والوريد ولازم خياطه فوراا وبعدين نشوف موضوع النزييف الجامد ده وافتكرنا عمال فى مصنع وان عصام اصيب من أثر ارتطامه بماكينة المهم ان من ساعة ماروحنا المستشفى وعصام على وجهه ابتسامة رضا وهدوء واطمئنان، الغريب لما سالته..انت كويس ياعصام رد عليا رد عجيب مايقلهوش غير واحد عنده ايمان ويقين صادق بموهبته وقدسية تجاه خشبة المسرح والجمهور قالى الحمد لله ان ربنا قدرنى وكملت العرض الناس مالهاش ذنب وكان لازم نكمل رسالتنا للآخر واخدنا عصام بعد ما اتخيط عدد وفير من الغرز وروحنا بيه على الفندق عشان من عجائب القدر إن اليوم صادف ان يكون عيد ميلاده واحتفلنا بيه وهوا على السرير".
وأنهى شريف دسوقي منشوره قائلًا: "عشان الموهوبين اللى عايزين يوصلوا من غير مايتعبوا ويشقوا ويحاربوا على فرصتهم بجد واجتهاد ويموتوا على فرصتهم، انا وعصام وأبو سريع وحسنى شتا وسما ابراهيم ومش عايز انسى حد، ربنا كرمنا وحققنا حلمنا، من غير مانقول الشماعات المريضة الثابتة إن الوسط بالواسطة والمحسوبية والشللية وأشياء اخرى، إيمانك بربنا ويقينك بنفسك هوا اللى هايحققلك حلمك شرط انك تخاطر لأن المخاطرة نصف النجاح وتجرب وتفشل وتجرب وتفشل وتجرب وتفشل لحد ماتوصل لطريقك وتكون قدوه مهمه لغيرك، اقسم بالله انا فرحان لعصام عمر اخويا وعشرة السنين، اكتر مافرحت لنفسى بكتير. واخدت منه درس الحياة، ربنا يحميك ويصونك يا عصام يا بن الأصول والبيت الكبير والتربية العالية والأخلاق الراقية".
