نجوى فؤاد تشكو: عمري ضاع في الفن علشان آخد 700 جنيه معاش

عبرت الفنانة الكبيرة نجوى فؤاد عن حزنها الشديد تجاه أوضاع الفنانين من كبار السن، الذين قضوا سنوات عمرهم في الفن، ويعانون من قلة الدخل، خاصة مع تردي الأوضاع المالية وقلة فرص العمل.

وقالت نجوى فؤاد عن حالتها الصحية في لقاء لها مع الإعلامية سهير جودة، من خلال الحلقات التي تقدمها عبر صفحتها على الفيسبوك: "عملت 3 عمليات تردد حراري، ومفيش حجاجة بتجيب نتيجة، المشكلة إني عندي القطنية والعصب لازق فيهم، والجراحة من أصعب وأخطر ما يمكن، وناس كتير خوفوني منها ودكاترة كبار، والحركة حاليا أحسن بس لازم حد يكون جنبي"

أما عن دعم نقابة المهن التمثيلية لها، قالت نجوى فؤاد: "مفيش أي دعم مادي، والنقابة لا بتسأل حد، والحقيقة أشرف زكي جالي وزارني ونور بيتي وسألته أنا إيه معاشي أنا امرأة مش متزوجة ولا عندي عيال، وقالي إنهم 600 أو 700 جنيه مش أكتر من كده، ضيعت 47 سنة في الوسط الفني، ولا شوفت شباب ولا مراهقة وما عشتش زي البني آدمين علشان اخد 700 جنيه في الشهر، دول أعمل بيهم إيه، وقالي إنه مقدم مذاكرة وربنا يسهل".

نجوى فؤاد: حالتي الصحية تمنعني من العمل 

وأكدت نجوى فؤاد أن حالتها الصحية تمنعها حاليا من العمل، قائلة: "ممكن أشتغل لكن مفيش حركة مش هقدر أطلع على سلم ولا أتحرك كتير، الحركة أضعف بكتير، وده اللي مخليني ما أشتغلش لأني مقدرش أضحك على الناس"

كما كشفت عن أسماء الفنانات اللواتي يحرصن على السؤال عليها بشكل دائم: "يسرا، فيفي عبده أكتر من مرة وهي ست جميلة، ومنة جلال دايما بتسأل، ومنة فضالي، وبعض أصحابي من خارج الوسط".