بعد هجوم المؤلف نادر صلاح الدين عليه.. رامي وحيد وضح حقيقة الحزء الثاني من فيلم حلم العمر
نفى الفنان رامي وحيد إعلانه عن تقديم جزء ثانٍ من فيلم “حلم العمر”، مؤكداً أن ما نُشر عبر حسابه على فيسبوك لا يعد إعلاناً رسمياً عن عمل جديد.
قال رامي وحيد، خلال مداخلة هاتفية في برنامج “كلمة أخيرة” مع الإعلامي أحمد سالم، “أنا كنت نايم صحيت لقيت كل ده حاصل، هو حد من الجمهور اللي بيحب الفيلم كتب عنده ونفسه يكون فيه جزء تاني وعملي منشن أنا وحمادة هلال وأنا عملت ريبوست، ولكني ما أعلنتش ده نهائيا، والناس دايما بيقولوا لينا نفسنا في جزء تاني من حبهم لفيلم العمر الأسطورة الأيقونية وبطله العظيم حمادة هلال ناس بتحبه وربنا كرمنا من حب الناس له ولكل العناصر اللي فيه، عناصر عظيمة زي وائل احسان ومحمد السبكي ونادر صلاح الدين، وموسيقى تصويرية راجح داود”.
وأشار "أنا بعيد عن التريندات أنا أي حاجة فيها جدل بعيد عنها وبريح دماغي، ومش بحب ارد على حد أساء ليا بقول الناس من الضغوطات اللي عليها بتقول كلام صعب، واحنا كانت علاقتنا طيبة أنا مستغرب من كلامه وبحترم الناس اللي بتحبني وبقول يا رب أكون دايما عند حسن ظن الناس أنا بقالي سنتين بره مصر علشان اعمل ناقلة في حياتي في التمثيل وعملت فيلمين في امريكا وفيلم منهم خذ جوايز كتير ومستني فيلم مهم بدور اساسي".
الرد على هجوم نادر صلاح الدين
وعن انتقادات المؤلف نادر صلاح الدين، أوضح رامي وحيد: “ربنا معاك أنا مش برد على حد بيقول حاجات سلبية وفرحان بردود فعل الناس، فيه حب كبير وأنا بحترم الناس كلها وأحمل اسم رجل عظيم عمره ما يرد إساءة لحد ودي إساءة غير مقبولة بس رد الناس كفاية”.
وأضاف رامي وحيد، أنه يفضل التركيز على مسيرته الفنية، خاصة بعد ابتعاده عن مصر خلال العامين الماضيين من أجل تطوير تجربته التمثيلية، حيث شارك في أعمال سينمائية خارجية، من بينها أفلام عُرضت في مهرجانات وحصدت جوائز.
خلفية الأزمة
كان المؤلف نادر صلاح الدين قد انتقد رامي وحيد عقب تداول أنباء عن جزء ثانٍ من فيلم “حلم العمر”، معتبراً أن الحديث عن العمل غير دقيق، وأن رامي وحيد لم يكن البطل الرئيسي للفيلم.
