أول تعليق من علي رؤوف بعد نجاته من حادث سير: "العربية راحت"

خرج الفنان علي رؤوف صاحب أغنية "أنا بشحت بالجيتار"، وكشف عن تفاصيل حالته الصحية بعد تعرضه لحادث سير في محافظة السويس، إثر اصطدام سيارته بأحد الأرصفة بمنطقة الغريب.

وكتب علي رؤوف عبر حسابه على فيسبوك: "أحب أطمنكم عليا وعلى صحتي، أنا بخير إلى حد ما، عندي شوية جروح وشرخ بسيط في نص القفص الصدري وكدمات شديدة في العمود الفقري، وبما إني صاحب الشأن، بنفي أي كلام إن حالتي حرجة، أنا محتاج بس راحة من أسبوعين لتلاتة أسابيع ومش حابب أتكلم عن تفاصيل الحادث".

وأضاف: "الناس عارفة إن دي أول عربية أجيبها في حياتي، وكانت حلم من أحلام عمري، بس مدام جت في الحديد فا في ستين مليون داهية، ومش محتاج أقول إنها تحويشة سنين، بس نقول إيه غير اللي إيده في الماية مش زي اللي إيده في النار".

وتابع: "أنا بخير الحمد لله، ومش زعلان على حاجة، ومسيري أقوم بالسلامة وأبدأ من الصفر تاني، وكل اللي طالبه منكم الدعاء لأن أي نجاح بوصله هو نتيجة 15 سنة تعب ومرمطة".

واختتم رؤوف منشوره قائلًا: "شكر خاص لرجال الأمن في السويس على إنقاذي أنا واللي كانوا معايا، وشكر كبير جدًا للأطباء في المجمع الطبي، ولكل أصحابي وحبايبي اللي سألوا عني، على راسي كل اللي اتلهف عليا وسأل عني وعن صحتي".