بعد غيابه 5 سنوات.. ياسر فرج يستغيث: "نفسي أرجع للتمثيل"

أعلن الفنان ياسر فرج رغبته في استئناف نشاطه الفني بعد انقطاع دام خمس سنوات، موضحًا أن ابتعاده كان نتيجة انشغاله برعاية زوجته خلال فترة مرضها حتى وفاتها.

قال فرج عبر حسابه على فيسبوك: "أتمنى أرجع تاني للوسط الفني وهرجع إن شاء الله، اختفيت لمدة 5 سنوات بسبب مرض زوجتي الله يرحمها وانشغالي مع أولادي في الظروف الصعبة دي، ده اللي بعدني جدًا عن شغلي وأصبح الرجوع مش سهل، ولكن راجع بإذن الله".

تفاصيل رحلة مرض زوجه ياسر فرج

أوضح خلال لقاء صحفي سابق: “زوجتي كانت حالتها بتسوء بالتدريج، ودعيت وقولت يا رب لو أنت مقدر وفاتها أنا راضي بس سهل المرحلة دي علينا وعلى الأولاد من غير خسائر نفسية، وربنا استجاب ليا بعدها بشهر بحس بيها إنها في البيت، وبحلم بيها إنها معانا، وممكن أبقى قاعد وولادي حواليا وأنا مش قادر أمسك دموعي”.

وأضاف فرج: "أنا عندي يقين كامل إن ربنا مش هيسيبني. وكانت حاسة قبل وفاتها ووصتني على الأولاد ومامتها وأنا والأولاد بنروح نقرأ ليها قرآن وبسيب كل واحد يقف قدامها يتكلم معاها ويفضفض معاها وبيبقوا حاسين بيها".

وتابع ياسر فرج: "قبل وفاتها كنا متأهلين أنا والأولاد إننا نستوعب فقدها، وكانت صدمة كبيرة بس كانت قليلة بالنسبة لأنها كانت تموت فجأة وإحنا كنا مؤهلين".