اعتزلت لعب الكرة عشان المزيكا.. أبرز تصريحات عفروتو مع أنس بوخش

استضاف برنامج ABtalks اللي بيقدمه الإعلامي أنس بوخش على قناته في يوتيوب، مطرب الراب عفروتو، إذ كشف خلال اللقاء عن تفاصيل من مشواره، بداية من لعبه الكورة وصولًا لدخول عالم الراب.

وخلال الحقلة قال الرابر عفروتو: " "أخويا الكبير كان لعيب أوي وأشطر مني في الكورة، وأهلي كانوا مبسوطين منه جدًا، ولما كبرت شوية حاولوا يقنعوني ألعب كورة زيه، ومع الوقت فعلًا بقيت أجمد واحد في فرقة المدرسة، وشافني مدرب من نادي الاتحاد السكندري وقال لي لازم تمضي للنادي، وابتديت ألعب كورة في سن صغير".

كان عندي شغف للمزيكا بنسبة 100 %

وأضاف عفروتو: "بس لما بدأت أغني راب كنت في آخر أيامي مع الكورة، وقربت أبطل، لأن المشوار في المجال ده صعب شوية، وبعد ما غنيت، دخلت كلية حقوق واتشهرت وأنا لسه بدرس، ورغم إني كنت بحب الكورة، لكن اكتشفت إن شغلي فيها كان بربع شغف، أما المزيكا والراب فكنت حاببهم أكتر من 100%".

إسكندرية عاصمة الراب في مصر

وعلى صعيد أخر تحدث الرابر عفروتو، عن مسقط رأسه وهي محافظة إسكندرية، مؤكد إلى أنها عاصمة الراب في مصر.

وتابع قائلا: "إسكندرية هي عاصمة الراب في مصر، ومش بقول كده علشان بلدي، لكن أكثر الرابرز المعروفين والناجحين دايما من إسكندرية، وهي بيئة خصبة للراب، جوها في الشتا بيساعد، وريحة اليود بحس إنها بتخلي الواحد يبدع كفنان".