بسبب الحسد.. إيناس عز الدين تكشف تفاصيل تعرضها لحادث مروع

تحدثت الفنانة إيناس عز الدين، عن تفاصيل تعرضها لحادث سيارة منذ 5 سنوات، إذ انقلبت سيارتها وسكنت المستشفى لسنوات طويلة، مشيرة إلى أن هذا السبب الرئيسي وراء غيابها عن الساحة الفنية.

وقالت إيناس عز الدين خلال استضافتها في برنامج "قعدة ستات" الذي تقدمه الإعلامية مروة صبري: "مكنتش بروح بيتي وكنت مقيمة في المستشفى، وكان بيجي بعض أصدقائي من الوسط يسهروا معايا في المستشفي عشان أخرج من مود التعب والوجع اللي كنت بحسه والمسكنات اللي باخدها، والموقف دا قربني من ناس مكنتش قريبة منهم وعرفني معادن الناس".

وتابعت الممثلة إيناس عز الدين، قائله: "كنت بحس نفسي ضعيفة بعض الوقت لكن ديما كنت بقرب أوي من ربنا، وبحافظ على سورة يس من صغري، وبعد الحادثة كنت بسبح ربنا وفجأة ألاقي نفسي بقول دعاء النجاة وبعدها حصل الحادثة والحمد لله ربنا نجاني".

وأضافت إيناس: "قبل الحادثة كنت موجودة فنيا بشكل كبير وبعمل شغل كتير وبسبب الحادثة اتأخرت 5 سنين، لكن دا قضاء وقدر ربنا بيختبر فيا مدى الرضا والصبر، والتأخير أحسن بكتير لأن وارد مكنتش أبقي موجودة خالص".

وانهت إيناس عز الدين، كلامها قائلة: "الحادثة أكيد كانت نتيجة حسد والحسد مذكور في القرآن، في واحدة في حياتي بتستكتر عليا الخير والفرحة، مكنش في أي عربية جمبي وكنت راجعة من التصوير ورايحة لأولادي وفجأة العربية اتقلبت بيا أكتر من مرة وكأن قوة إلهية طلعتني من العربية في الاتجاه التاني من الطريق، والناس كانت بتدور عليا في العربية بعد الحادثة، قوة العين الحاسدة صعبة".