سالي عبدالسلام: الصلاة رقم واحد عندي.. بكلم ربنا وبحكيله كل اللي جوايا
تحدثت الإعلامية سالي عبدالسلام عن علاقتها بالصلاة، مؤكدة أنها تمثل لها وسيلة للتقرب إلى الله والحديث معه، خاصة في أوقات الخوف والقلق، مشيرة إلى أنها تحرص على الدعاء وطلب كل ما تتمنى من الله.
الصلاة رقم واحد
وقالت سالي عبدالسلام خلال استضافتها في بودكاست "قوت القلوب": "أنا عندي الصلاة رقم واحد، لأني بكلم بيها ربنا، كل يوم بكلم ربنا 5 مرات، وأروح أقوله واشتكيله: شوفت يارب عمل فيا إيه؟ ويا رب أنا كنت غلط في كذا، وبعدين بيسمعني رسايل، يعني ممكن أخلص الصلاة وأقوله: أنا خايفة من كذا، وأقوله هو ممكن يحصل كذا".
وأضافت: "وأنا دايمًا سورة البقرة مبتنقطعش من البيت، ومعرفش أنام من غيرها، فمثلًا أقوم من النوم ألاقي: (أولئك لا خوف عليهم ولا هم يحزنون)، وعايزة من ربنا كل ستر وحاجة جميلة".
وفي وقت سابق، شاركت الإعلامية سالى عبدالسلام مجموعة من الصور جمعتها بأطفال إحدى دور الرعاية، وذلك بعد أيام من إعلان حملها في طفلها الأول، عبر حسابها الرسمي على موقع إنستجرام.
علقت سالى عبدالسلام على الصور التي نشرتها قائلة: "هذا هو المكان الذى أنتمى إليه، أسميهم عائلتى.. قضيت رأس السنة هناك وكنت مسافرة عمرة يومها ومنفعش كدة إحنا 9 سنين ولا 10؟؟؟ فكرونى".
وأضافت في تعليقها: "من أول يوم جيلان علاء خدتنى معاها الدار.. وأنا بحبكم.. ماشية بدعواتكم والله.. لما أقولكم انكم رزقى بتصدقونى وبقى فى ثقة مرعبة انكم رزقى والبصة تكفى، أنا رزقى فى الغريب.. مش فى القريب، وانتوا بالدنيا عندى.. اتفرجوا على صوركم وعيشوا عليا اللحظة زى ما وعدتكم هنزلها".
كما وجهت الإعلامية سالي عبدالسلام رسالة شكر لمتابعيها بعد ساعات من ولادتها، لمساندتها أثناء فترة حملها، وذلك عبر خاصية "الاستوري" على حسابها بموقع "إنستجرام".
وأعربت عن تقديرها للدعم الذي تلقته خلال فترة الحمل، كاتبه: "الحمدلله حمدًا كثيرًا، مشيت بكرم ربنا ودعواتكم ورضا أهلي، مش عارفة أشكرككم أزاي والله، دعوات أكتر ممكن محتاجها أوي والله".
وكانت سالى عبدالسلام قد أعلنت خبر حملها عبر حسابها على فيسبوك، من خلال مقطع فيديو نشرته مع بداية العام الميلادي الجديد، وكتبت: "بسم الله نبدأ 2026 ببركة ورزق وهبة من الله".
وتابعت حديثها عن تفاعل الجمهور قائلة: "أنا من إمبارح عايزة أعيط من جمالكم بجد، وأنا شفت دعوات عمرى ما شفتها فى حياتى.. شكراً من قلبى لكل المتابعين".
حديث عن الدعاء والتجربة الشخصية
كما كشفت سالى عبدالسلام عن كواليس قرارها إعلان الخبر مبكرًا، وقالت: "كل اللى حواليا قالولى متقوليش وانتظرى، قولى لما تولدى.. بس حقكم إنكم تعرفوا دعواتكم اللى شوفتها وسمعتها أو اتقالتلى فى وشى إن ربنا كرمنى بيها وبكل واحد فيكم.. وده سر قوتى وعمرى ما بنسى".
وأضافت: "ولما الناس بتقولى اشمعنى أنتى بيدعولك أو بيحبوكى بخاف اتحسد عليها، آه دعوات الناس تغير الأقدار ومستجابة أكتر من دعواتى لنفسى".
كشف تفاصيل إنسانية مؤثرة
واختتمت سالى عبدالسلام حديثها بالكشف عن تجربتها السابقة، قائلة: "لو قولتلكم إنى استنيت دورى سنين عشان ربنا يرزقنى الرزق والهبة دى عارفة انكم هتصدقوا.. الحمدلله خسرت توأم بس ليا بيتين فى الجنة وبدعواتكم ربنا كرمنى وهيكرمنى وهيكملها على خير وهيبقى معايا زينة الحياة الدنيا".
وأضافت: "عايزة دعوات كتير أوى، أكتر من الدعوات اللى فاتت والله عشان الطريق مش سهل وكل شوية يحصل حاجة تصعب المشوار ومضاعفات وكل شوية أخاف أكتر، أضعاف ما دعيتم وتمنيتم يا رب ربنا يرزق كل واحد نفسه يارب".
