أسما شريف منير في عيد ميلادها: آخر 3 سنين عدوا عليا بألم وانكسارات وخذلان

نشرت أسما شريف منير عبر حسابها الرسمي على "إنستجرام" مجموعة من الصور، تزامنًا مع احتفالها بعيد ميلادها، مرفقة بتعليق مطول كشفت خلاله عن تفاصيل مرحلة مهمة في حياتها.

وكتبت عبر حسابها علىإنستجرام: "النهارده عيد ميلادي، وآخر سنة ليا في الثلاثينات، ودي صور انهارده مافيش بهرجه، زمان كان عيد ميلادي ده احتفال مش عادي، أهلي كانوا بيحجزوا أماكن ويجيبوا magician وDJ  ويبعتوا دعوات لـ مية حد، وعمري ما كنت بشوف عيد ميلادي يوم عادي أو حاجة صغيرة، بالعكس كان دايمًا يوم كبير جدًا بالنسبالي، وكنت بعد الأيام من أول مارس لحد ما ييجي".

وتابعت: "بس آخر 3 سنين عدوا عليا بألم كتير وخيبات أمل وانكسارات وخذلان، وشوية شوية بطلت اهتم بعيد ميلادي، بطلت أخطط، بطلت أعد، بطلت أستنى".

العمل على التعافي النفسي

وأوضحت: "لأني كنت مشغولة أحاول أنقذ نفسي وأتعالج وأقوم وأشتغل على الـ anxious attachment بتاعتي وأرمم قلبي من وجع ناس أذوني ومحولوش عشاني وسابوني، وده أخد مني كتير أوي عشان أكون أحسن وحقيقي اتعافي".

بداية رحلة روحانية

وأشارت: "ومن السنة اللي فاتت بدأت رحلتي الروحانية مع ربنا، ولقيت فيها حاجات كتير ولسه بدور ولسه بتعلم ولسه باكتشف".

تغيير نظرتها للاحتفال

وأكدت: "بس السنة دي جزء كبير مني مش عايز عيد ميلاد شكلو حلو من بره بس مش حقيقي، أنا عايزة دعاء من القلب، مابقتش عايزه أتمنى واتطفي شمعة وأمنية سطحيه و أقلب، بقيت أطلب من ربنا بشكل واضح اللي أنا حقيقي بتمناه، وعندي إحساس إن السنة دي هتكون سنة تحوّل حقيقي، سنة تطهير كبير ومعتقدات جديدة وبداية جديدة".

أمنيات بسيطة

وتابعت: "اللي بتمناه دلوقتي بسيط، إني أحس بالهدوء، وإني أحس إني محبوبة ومقدّرة وآمنة بجد، وإني أكون حواليّا ناس بتوعد إنها متمشيش".

وأردفت: "الناس دي موجودة في الصورة دي، الناس دي ما سابتنيش، وماخلتنيش أحس إني بشحت حب أو دعم، حبوني من غير أي طلبات أو مقابل".

واستكملت: "جوزي وبنتي ربنا يبارك فيهم، الإتنين دول بيتي، الإتنين دول صدقوا فيا وحبوني وأنا في أصعب أوقاتي، ومن غير ما أطلب، وبالحب ده رمموا جزء جوايا ماكنتش متخيلة إنه ممكن يتصلح".
 

أسما شريف منير تطلب الدعاء
 

واختتمت: "السنة دي أنا بطلب من كل حد يقرأ الكلام ده إنه يدعيلي، إن ربنا يباركلي في الرحلة الجاية، وإن حياتي تتحول، وإن قلبي يرتاح، وإن الـ anxiety تمشي، وإني أقرب لربنا، وإن ربنا يرزقني الجنة... بس أكون حوالي ناس مابتأذينيش، مابتسيبنيش، وما بتحسسنيش إني أقل".